Bakit nga ba? Ito ang ilan sa mga dahilan.

1. Nanatili ang P600-Milyong target na koleksiyong ipinataw ng administrasyong Aquino sa Bureau of Customs (BOC) mula sa ating mga balikbayan box.

Ipinatigil ng gobyerno ni Aquino ang pagsasagawa ng random inspection sa mga balikbayan box at ito ay maituturing na panimulang tagumpay para sa mga overseas Filipino worker (OFW) at kanilang pamilya. Ngunit sa kabila nito, nananatili pa rin ang atas ni Aquino sa Bureau of Customs (BOC) na abutin ang P600-M target na kikitaing buwis mula sa ating mga balikbayan box.

Matatandaan na ang P600-M target na ito ang ginawang dahilan ni BOC Commissioner Alberto Lina para ipatupad ang garapalan at lapastangang paghahalughog sa mga balikbayan box. Matapos ang matagumpay na protesta ng migrante at pamilya laban dito, nanatiling tahimik ang gobyerno at bigong ilatag ang plano kung paano nila kokolektahin ang nasabing halaga mula sa mga diumano’y “smuggled” o “non-declared goods” sa mga balikbayan box.

Kaya’t habang nananatili ang atas ni Aquino na abutin ng BOC ang P600-M target, naniniwala tayo na pakitang-tao at palusot lamang ang pagpapatigil sa random inspection at walang ibang layunin ito kundi buhusan ng malamig na tubig ang malawakang galit ng migrante at pamilya. Ang ating panawagan ay iatras ni Aquino ang P600-M target na koleksiyon mula sa ating mga balikbayan box.

2. Tiyak ang direktang epekto sa mga OFW ng pagtaas ng singil ng BOC sa clearing fees sa lahat ng mga container van na papasok sa mga pier ng Pilipinas mula P100,000 tungong P120,000 kada container.

Ano kaya ang dahilan sa likod ng biglaang pagpapataw ng karagdagang kita na P600-M mula sa ating mga balikbayan box, ilang buwan bago magsimula ang panahon ng eleksiyon? Nagtaas na ng P40,000 ang singil ng BOC noong Hulyo 27 at nakaamba ang susunod na pagtaas pagdating ng Oktubre 1.

Ang P100,000 pagtaas ay magiging katumbas ng US$7 o P325 dagdag-bayarin kada balikbayan box. Isa na naman itong dagdag-pahirap sa migrante at pamilya. Kung hindi makukuha ang target na pondo para sa eleksiyon sa random inspection, kukuhanin naman ngayon sa taxation.

3. Hindi smuggler ang mga OFW!

Kailangan ngayong magpaliwanag ng BOC at administrasyong Aquino sa mga migrante at mamamayan. Kailangang sagutin nila ang matagal nang tanong ng mga migrante at mamamayang Pilipino tungkol sa kabiguan nilang sawatain ang pagpupuslit ng kalakal ng big-time smugglers. Dapat nilang habulin ang big-time smugglers at hindi ang mga migrante na araw-araw nagsusumikap para lamang tiyakin ang pagpapadala ng kanilang pinaghirapang remittances at balikbayan boxes sa bansa.

Dapat isapubliko ng BOC ang kumpletong ulat tungkol sa lahat ng sinasabi nitong mga kaso ng ilegal na mga kontrabando at ipaliwanag kung ano na ang nagawa nila para tugisin at ikulong ang big-time smugglers, kasama na ang mga nasa loob mismo ng BOC.

Dapat ding isapubliko ng BOC ang buong ulat tungkol sa balikbayan boxes na kanilang binuksan at hinalungkat, at ang resulta ng kanilang inspeksiyon. Marapat ding pagbayaran at humingi ng tawad ang BOC sa LAHAT ng may-ari ng mga balikbayan box na kanilang arbitraryong binuksan at hinalungkat.

4. Ang P600-M target na kita mula sa mga balikbayan box ay malayong-malayo kumpara sa halaga ng pondong inilalaan ng gobyerno para sa direktang serbisyo sa mga migranteng Pilipino.

Halimbawa na lamang ang Legal Assistance Fund (LAF) at Assistance to Nationals Fund (ATN). Alinsunod sa Republic Act 8042 o Migrant Workers Act of 1995, P100-M ang inilalaan kada taon para sa LAF, habang P100-M lang din ang nakalaan para sa ATN. Manapa, ang panukalang badyet sa mga serbisyong ito ay nagkataon at kagulat-gulat na hindi makita sa inihaing 2016 National Expenditure Program (NEP).

5. Matagal nang itinuturing ng gobyernong Aquino ang migranteng Pilipino bilang mga gatasang-baka.

Bukod sa “legalisadong kotong” sa mga balikbayan box, notoryus ang administrasyong Aquino sa pagpapatupad ng mga ilegal, labis-labis at dagdag-pasakit na mga bayarin at buwis na ipinapataw sa mga migrante — tulad ng pagtaas ng bayarin sa ePassport at Philhealth premium, ang sapilitang paghuhulog ng kontribusyon sa PagIbig Fund, P550 terminal fee, Affidavit of Support at iba pang di-makatwirang consular fees.

Serbisyo, hindi negosyo! Proteksiyon, hindi koleksiyon!

August 28 ay Zero Remittance Day.