Sining biswal na nagpapakilos

December 6, 2019

Sa gitna ng financial hub ng namamayaning sistemang pang-ekonomiya, namayagpag ang eksibit na walang takot at nakikibaka

Tunay ngang hindi lang palamuti ang sining. May kakayanan rin itong maging mapangahas, at manghimok. Lalo na sa panahon ng kawalan ng hustisya sa lahat ng aspeto ng pamumuhay – sa pulitika hanggang sa sosyo-ekonomiko – isa itong armas ng mga mamamayan sa pakikibaka.

Anim na obra, tig-tatlo sina Renan Ortiz at Melvin Pollero, ang kasalukuyang naka-display sa Kanto Art Space sa Makati City. Pinamagatang MKBK WG MTKT (daglat ng makibaka huwag matakot), binigyan ng dibuho ng dalawang alagad ng sining-biswal ang kanilang tindig sa kasalukuyang lagay ng mga mamamayang Pilipino.

Hindi na bago ang dalawang alagad ng sining. Regular silang dibuhista ng Pinoy Weekly. Parehas rin silang miyembro ng Tambisan sa Sining, grupong kultural na kilala sa kolektibong paggawa ng mga likhang sining tulad ng mga mural, effigy at iba pang liking-sining para sa mga kilos-protesta.

Gamit ni Renan ang tradisyunal na hagod ng tinta upang mabuo ang kanyang mga dibuho. Dalawa sa kanyang obra ay print copy ng kanyang dibuho na alay sa mga manggagawa. Naging tanyag na ang kanyang End ENDO sa kampanya ng unyonistang manggagawa upang labanan ang kontraktuwalisasyon.

Binigyan naman ng pagpapahalaga ni Melvin Pollero ang karaniwang mga mamamayan. Pinapakita ng tatlo niyang obra ang tatlong kalbaryo ng mga mamamayan – ang tila pagpapabaya sa maralita na nagtatanong kung paano na ang buhay nila sa samu’t saring isyung panlipunan, ang kalbaryo ng mga mamamayan sa mga bayarin, pangunahin ang kuryente, at ang unti-unting pagkawasak ng magandang imahe ng bansa, na isinalarawan ng isang tradisyunal na kababaihang Pilipina, sa gitna ng development aggression.

Mayroong sense of urgency o halaga sa kasalukuyang sitwasyon ang kanilang likhang sining. Bukod sa pinong paggawa, ang kanilang sining ay sining rin ng protesta, na anila’y nagmula pa sa tradisyon ng protestang sining mula pa noong Sigwa ng Unang Kuwarto. Hindi rin lang isang palamuti ang anim na dibuho, kundi panawagan na rin sa pagkilos, isang paalala sa kawastuhan ng protesta, at isang testamento ng kawalan ng takot ng mga aktibista sa gitna ng karahasan sa kanilang hanay.

Sa panahon ng kawalang hustisya at pagpapatahimik sa mga kritiko ng administrasyong Duterte, may puwang pa ang sining hindi lang upang ipakita ang kasalukuyang kalagayan ng lipunan, ngunit manghimok din ng damdamin ng sambayanan at magpakilos upang labanan ang namumuong tiranya.

Darius Galang

Darius Galang

Darius Galang covers migrant and women's issues for Pinoy Weekly, while also working as a graphic artist and photographer. He is one of PW's long-time editorial staff and was a product of Manila Collegian of the University of the Philippines-Manila campus.