Tatlong araw na lang sana bago ang pormal – pero sikreto – na pagbubukas ng ikalimang round ng usapang pangkapayapaan sa pagitan ng administrasyong Duterte at rebolusyonaryong kilusan nang biglaang inanunsiyo ni Pangulong Duterte na hindi na siya interesado sa makipag-usap.

At hindi lang iyun: Sa harap ng midya, katabi ang mga oligarko tulad ng mga Ayala na dati niyang minumura, inanunsiyo rin niyang magkakaroon ng crackdown ang gobyerno laban sa legal na Kaliwa na binabansagan niyang kakampi ng rebolusyonaryong National Democratic Front of the Philippines (NDFP). Ilang araw matapos nito, inanunsiyo na rin ng Armed Forces of the Philippines (AFP), ang matagal na nitong pinapatupad: ang paglulunsad ng all-out war o lahatang-panig na giyera ng gobyerno laban sa rebolusyonaryong kilusan.

Hindi pa nakuntento, ilang araw pa matapos nito, nilagdaan ni Duterte ang Proclamation No. 360 na nag-uutos sa pagwawakas sa usapan. Kinabukasan, nagpaliwanag pa si Duterte hinggil sa pag-atras ng rehimen niya sa usapan: gusto raw kasi ng NDFP ng koalisying gobyerno — bagay na pinabulaanan ni Jose Maria Sison, punong konsultant pampulitika ng NDFP. (Simpleng search sa Google sa Internet ang magpapakitang si Duterte ang unang nagmungkahi sa NDFP, pati sa Moro National Liberation Front o MNLF ng isang koalisyon, noon pang 2014.)

Pero ang totoo, nakatakda na sanang lagdaan ng dalawang panig ang kasuduan hinggil sa mga repormang sosyo-ekonomiko, ang Comprehensive Agreement on Social and Economic Reforms (Caser). Bukod sa pagbibigay-daan sa isang sabayang unilateral ceasefire sa magkabilang panig, magbebenepisyo sana dito ang milyun-milyong Pilipinong magsasaka at manggagawa.

Kasama sa lalagdaan sanang Caser:

• Libreng pamamahagi sa lupaing agrikultura para sa mga magsasaka, manggagawang bukid, at mangingisda;
• Nakadakdang mabilis na ipapamahagi ang lupain sa mga benepisyaryong matagal nang pinagkakaitan ng karapatan nila sa lupa;
• Lalawak ang sakop ng repormang agraryo para sakupin ang mga plantasyon at malalaking komersiyal na mga sakahan na sakop ng iba’t ibang iskema na pinatupad para iwasan ang repormang agraryo;
• May mga hakbang na ipapatupad para ipagbawal ang mapagsamantalang pangungutang at pangangalakal sa agrikultura;
• Magkakaisa sana ang NDFP at gobyerno ng Pilipinas (GRP) sa pangangailangan para sa pambansang industriyalisasyon at pagpaplano para sa pagpapaunlad ng mga industriyang Pilipino;
• Gagawa sana ng mga hakbang para masigurong matitigil ang mga dayuhang pamumuhunan na di-papabor sa pambansang ekonomiya;
• Mapoprotektahan sana ang local na mga industrialist at maliliit na empresa;
• Pahahalagahan sana ang pagsasabansa ng pampublikong mga yutitlidad tulad ng kuryente, tubig at langis;
• Pumayag n asana ang dalawang panig na tumukoy ng susing mga industriya na iindustriyalisa;
• Kikilalanin sana ang kahalagahan ng mga union at mga konseho ng mga manggagawa.

Matapos ang paglagda sa Caser, nakatakda na sanang pag-usapan ang mga repormang pampulitika at konstitusyonal.

“Buo ang responsabilidad ni Pangulong Duterte sa pagkabigo ng mga usapan sa mga repormang sosyo-ekonomiko dahil sa mabilis niyang pagtalikod at pagtindi ng pandarahas sa mga puwersang rebolusyonaryo at mga mamamayan,” sabi ni Julieta de Lima, tagapangulo ng NDFP Reciprocal Working Committee on Social and Economic Reforms.