Sining para sa masa


Mga artista, nagkaisa para isulong ang pakikibaka ng mga magsasaka.

Sa isang maliit na bar sa Kamuning, nagtipon ang mga musikero, manunulat, dibuhista, aktor, at iba pang artista para sa iisang layunin: Gamitin ang sining para isulong ang pakikibaka ng milyun-milyong Pilipinong bahagi ng sektor na nagpapakain sa sambayanan—ang mga magsasaka.

Sa Catch 272 binuo ang alyansang Sama-Samang Artista para sa Kilusang Agraryo o SAKA na kinabibilangan ng mga organisasyon at indibidwal na naniniwalang malaki ang papel ng mga artista sa pagbabagong panlipunan. Para umano organisadong tuparin ng SAKA kanyang layunin, malapit itong makikipagtulungan sa “Barangay Pesante” na binubuo ng iba’t ibang organisasyon ng magsasaka sa Pilipinas.

Si Ericson Acosta ng KMP. <b>Marjo Malubay</b>
Si Ericson Acosta ng KMP. Marjo Malubay

Nagsasagawa ang grupo ng regular na talakayan at workshop na tinawag nilang “Kapasikaran” na nangangahulugang “pundasyon” sa wikang Bisaya. Sa araw ng pagkakabuo ng SAKA, tinalakay nila ang paksang “Barangay Pesante: Cultural Work and the Philippine Peasant Struggle for Genuine Land Reform” sa pangunguna ni Ericson Acosta ng Kilusang Magbubukid ng Pilipinas.

“Nakita ng nakaraang ilang taon ang aktibong paglahok at pakikisangkot ng mga grupo, indibidwal na artista, at mga manggagawang pangkultura sa mga isyung magsasaka. Ito ang nagbibigay sa atin ngayon ng tulak upang magtipun-tipon, magtalakayan, at magsikap na itaas ang antas ng ating pagkakaisa,” ani Acosta sa pambungad na mensahe ng Kapasikaran sa Catch 272.

Layunin ng grupo na ilapit ang mga indibidwal na artists at grupong pangkultura sa pakikibaka ng mga magsasaka at kampanya nito para sa libreng pamamahagi ng lupa, tunay na reporma sa lupa, at hustisyang panlipunan. Sa pagdaan ng panahon ay napatunayan nang malaki ang naitutulong ng mga artists sa pagsusulong ng pagbabagong panlipunan partikular sa pakikibaka ng mga magsasaka.

Sa Hacienda Luisita, halimbawa, ay mahusay na naikuwento sa dokumentaryong Sa Ngalan ng Tubo ang brutal na pamamaril sa mga magsasaka ng asyenda para buwagin ang itinayo nilang welgang-bayan. Ang mga nakuhang litrato at bidyo ng mga nagkokober na midya at mga artista na sumusuporta sa kampanya ng mga magsasaka ay nakahadlang sa pambabaliktad ng tunay na naganap noong araw na iyon. Ayon kay Acosta, ipinakita ng dokumentaryo na ang Pilipinas ay saklot pa rin ng piyudalismo at pasismo.

“Mga anyong pangkultura gaya ng video documentary, koleksiyon ng tula, mga awit at iba pa, ang tumulong sa pagpopularisa sa isyu ng Hacienda Luisita mula pa sa panahon ng welga at masaker noong 2004,” ani Acosta.

Naniniwala ang SAKA na makakabuo lamang ng epektibong anyo ng sining, midya, at panitikan kung idudugtong ito sa isyu ng mamamayan, na siyang esensiya ng sining para sa kanila dahil ang tunay na artista ng bayan ay hindi lamang nagsusumikap na baguhin ang mapangaping kultura ng lipunan, nakikibaka rin ito para buwagin ang pang-ekonomiko at pampulitikang gapos ng masang inaalayan niya ng kanyang likhang sining.