Pakikipagkaisa ng mga taga-Maynila sa Kidapawan

April 8, 2016

Dinaluhan ng iba't ibang indibiduwal at organisasyon ang pagkukuwento ng mga taga-Kidapawan sa nangyari madugong dispersal sa kanila noong Abril 1. <strong>Iya Espiritu</strong>

Sa pangunguna ng Pagkakaisa para sa Tunay na Repormang Agrarayo (PATRIA) at Bagong Alyansang Makabayan (BAYAN), nagtipon ang mga taong simbahan, artista, guro, abogado, kabataan at iba pang tagasuporta ng mga magsasaka ng Kidapawan sa Unibersidad ng Pilipinas-Diliman, Quezon City.

Ayon kay Jerome Succor Ada ng SUARA, “umiiral ang Martial Law sa North Cotabato; sa 6,000 magsasaka 2 ang patay, 10 sugatan na nasa ospital na sinampahan na din ng mga gawa-gawang kaso kabilang dito ang tatlong babeng buntis, 71 ang inaresto at marami pa ang nawawala.  Mistulang war zone ang paligid nang maganap ang masaker.”

Dagdag pa niya na hindi tutuong warning shot ang mga putok dahil kung magkaganun man di sana 3 putok pataas kundi nasa mahigit 40 putok at pinaulanan sa bulto ng mga magsasakang bigas at ang nakatalagang badyet lamang ang hiling sa lokal na pamahalaan.

Hindi itinatangging marami ang mga bata at kababaihan ang nasa rally. Ito ang isang anggulong pilit na idinidiin sa kanila ng PNP at ilang opisyales.

Ayon kay Mercedita Andas, 34 taong gulang at may dalawang anak, “isinama ko ang aking mga anak dahil wala naman silang makakain sa bahay, sila mismo ay gusto din sumama para makakuha din sila ng bigas para sa aming pamilya. Hindi tutuong ipinapahamak namin ang mga bata.”

Walang mangyayaring masama kung hindi sila hinarang at dinahas mismo ng mga kapulisan. Nag-iyakan umano sila nang maganap ang pamamaril dahil nasaksihan nila ng mga bata ang duguang magsasakang kanilang katabi, dagdag ni Andas.

Sa ikaapat na araw, umalis na ang mga kapulisang nakapalibot sa United Methodist Church, ang simbahang kumupkop at umaruga sa mga magsasaka. Dumating na din ang iba’t-ibang grupong nais magsagawa ng kanilang imbestigasyon.

Isa ang National Fact-Finding Mission na binubuo ng mga progresibong human rights workers, mga duktor, midya, abogado at iba pa na magsasagawa ng sistematikong dokumentasyon at pakikipanayam sa mga biktima ng masaker.

Ayon kay Rev. Joy Mirasol ng Promotion for Church and People’s Response (PCPR), “galit ang aming nararamdaman ngayon sa kawalan ng puso ni Gobernador Lala Talino Mendoza at ang pagbingibingihan ni Noynoy Aquino.”

Si Merceditas Andas, sa kaniyang pagharap sa mga taga-Maynila tungkol sa kanilang naging kalagayan sa Kidapawan. <strong>Iya Espiritu</strong>
Binahagi naman ng Bagong Alyansang Makabayan ang mga susunod na hakbang para sa kampanyang Bigas Hindi Bala para sa mga magsasaka ng Kidapawan.  Tuloy-tuloy ang relief drive, pagbibigay ng suportang ligal sa tulong ng National Union of Peoples’ Lawyer.
Samantala, matagal nang ikinakampanya at sinasabi ng Kilusang Magbubukid ng Pilipinas (KMP) na tunay na reporma lupa ang pangunahing solusyon sa problema ng mga magbubukid.  Ngunit, ilang beses nang binibigo at nililinlang ang mga magsasaka.

Ilang masaker na umano ang naganap — Mendiola, Lupao, Luisita at ngayon Kidapawan.  Sa mahabang panahon hindi ang interes ng magsasaka ang inaatupag ng gobyerno kundi ang interes ng mga negosyante at dayuhang kapitalista, ayon kay Rafael Mariano, tagapangulo ng KMP.

“Ito ang dahilan kung bakit pinapalitan ang gamit sa lupa (Land Use Conversion) at nagtatayo ng mga real estates, mga malalaking gusali o di kaya’y pagdidikta ng kung ano ang itatanim pabor sa interes ng mga naghaharing-uri,” ayon kay Mariano.

Ang bansang Pilipinas ay isang agrikulturang bansa. Kailangan itong paunlarin ayon sa pangangailangan ng sariling mamamayan upang maging produktibo at mabuhay ng marangal.  Sabi nga ni Mercedita, “pangarap ko na makakain ng tatlong beses ang aking mga anak at magkaroon ng lupa, matabang lupa na kanilang pauunlarin para mabuhay nila ang kanilang pamilya.”