Goodbye Panot

July 10, 2015

Paumanhin sa mga panot at napapanot. Iyan kasi ang bagong bansag sa superpaputok na Goodbye Philippines nang salubungin natin ang 2015.

*    *    *

Kabisado ng mga nagtinda ng paputok ang gusto ng taumbayan: mabura sa balat ng lupa si Noynoy. Kung hindi man sindihan ang puwet.

*    *    *

“Kung susuriin mo, ano nga ba ang pinagkaiba ng dalawang ito,
Lalo na kung panot at pandak —
Ang pandak na si Gloria Arroyo
At ang panot na si Noynoy Aquino?

Pare-parehong pahirap sa mga Pilipino.

Ang Pandak at ang Panot, Anthony Osorio

*    *    *

“Pati sa battle rap nakarating ang anino ni Noynoy. Sabi nga ni BLKD kay 2Khelle:  Basta’t puti at may pera, dinudiyos mo? / Pareho kayo ni Noynoy dahil Kano ang boss mo.”

*    *    *

Sino pa nga ba ang boss ni Noynoy? Ang taumbayan ba? Ang mga magsasaka ba tulad ng mga minasaker sa Hacienda Luisita? Ang mga manggagawa at empleyado bang hindi makaungos-ungos ang sahod at suweldo dahil sa kontraktuwalisasyon? Ang kabataan ba na pinapaupo sa sahig sa mga state college at university para mapilitang mag-enrol sa private school? (wag sanang masadlak sa prosti-tuition) Ang mga mahirap bang halos linggo-linggo ay ginigiba ang mga bahay?

*    *    *

Huling SONA (State of the Nation Address) na niya ito. Kaya binasa ko ang kanyang kauna-unahang SONA. Hindi ko inakala na darating tayo sa puntong ito, na ako’y manunumpa sa harap ninyo bilang inyong Pangulo, sabi niya. Aba, ewan lang. Naging congressman, senador (tumakbong senador dahil hindi na siya pwede pa uling tumakbo bilang congressman), ewan, kung hindi niya pinangarap ang maupo sa Malakanyang. Isang buwan bago pumanaw ang nanay, nagdeklarang tatakbo bilang pangulo.

*    *    *

“Aminin mong interes ng uri ang hatak
Uunahin ang angkan kaysa laksang naghihirap.
Kaya SONA mo’y harapang kasinungalingan:
Hindi man pumitada sa daan ang iyong wang-wang
Hindi rin naman narinig ang tinig ng katarungan
At dahil diyan, walang-wala ka Noynoy, sa tuwid na daan.”

Tuwid na Daan (sa ikatlong SONA ni Pnoy), Joey Baquiran

*    *    *

Sa unang SONA ni Noynoy unang sumikat ang wangwang, tuwid na landas, at (ang award-winning pang) Kung walang corrupt, walang mahirap.

*    *    *

At maging mga tula ay nakamasid at kritikal, hindi lamang sa kanyang mga programa, kundi maging sa mga boladas niya sa SONA. Sabi nga ni Nonilon V. Queano sa kanyang tulang Ulat at Protesta sa SONA (Para kay Pangulong Noynoy):

(Bawat taon ng buhay ko’y nagmamartsa’t sumubaybay
Sa SONA mo, O pangulo.
Ngunit minsa’y walang maalalang nagpahayag ng totoo.)

*    *    *

Hindi nag-noynoying ang mga makata mula umpisa. Ni hindi pinatawad ang honeymoon period ni Noynoy. Sinalamin ng mga tula kung paanong naging pikon si Noynoy sa kanyang mga kritiko. Sabi nga ni John Iremil Teodoro sa kanyang tulang Pagmumuni-muni ni PNoy Tungkol sa Kaniyang Ika-isandaang Araw sa Malakanyang Habang Nagbabakasyon sa Hacienda Luisita:

“Heto ako, anak nina Cory at Ninoy,
Kuya ni Kris, maraming-marami ang bumoto,
Matatas mag-Tagalog-based Filipino,
Binatang hasyendero na allergic sa wangwang,
At paboritong tuta ng mga Amerikano.
Sana tumahimik na sila
Para makatulog naman ako nang mahimbing
Dito sa Hacienda Luisita.
Ayokong lalong makalbo.”

*    *    *

Ngayong huling SONA na ni Noynoy, masa-summarize ang kanyang buong panunungkulan bilang pangulo sa tulang Hindi Dapat Maging Pipi sa PPP (Tula ng Krusada Kontra PPP ng Gobyernong Aquino) ni Fernando Laroga Hicap:

“O Benigno Simeon Aquino III, isa kang malaking trahedya sa bayan ni Juan”

Kaya mag-throwback Thursday tayo sa unang taon ni Noynoy sa Malakanyang — sa tulang Ang Daan Patungo sa Pagbabago ayon kay Noynoy Aquino ni Alexander Martin Remollino — na para bang talumpati ng pangulo sa kanyang unang SONA kapag nahubaran na ng retorika:

“Ako, si Noynoy Aquino,
na lubusang nakatitiyak
na ang mandatong nakuha ko sa huling eleksiyon
ay patunay
na umaasa pa rin ang Pilipino sa pagbabago,
ay nagdedeklara ngayon
na ito ang daang tatahakin natin
tungo sa pagbabago:

Boom tarat tarat
Boom tarat tarat
Sasara ang bulaklak
Bubuka ang bulaklak
Dadaan ang reyna
Ang saya-saya
Boom-tiyaya
Boom-tiyaya
Boom-yeye
Tiyaya
Tiyaya
Tiyaya-boom
Yeye-boom
Yeye-boom
Spageting pataas, pataas nang pataas
Spageting pababa, pababa nang pababa
Spageting pataas, pababa at pataas
Spageting pababa, pataas at pababa
The quick brown fox jumped
Over the lazy dog
In the stream
Over the lazy dog
In the stream
The quick brown fox
Jumped
Monkey, monkey, Anabel
How many the monkey
Did you see?
Tararat
Tararat
Boom boom boom

Ito, mga minamahal kong kababayan
ang daang tatahakin natin
tungo sa pagbabago.

Maraming salamat po.”