Kalakhan sa atin, wala pang muwang o hindi pa buhay noong panahon ng mga base militar ng Estados Unidos sa Pilipinas. Hindi na natin nadatnan ang mga sundalong Amerikano na nakahimpil sa Clark Air Base at Subic Bay Naval Complex. Hindi na natin masaksihan kung paano malagay sa panganib ang ating bansa sa mga giyerang agresyon ng Estados Unidos sa Vietnam at Korea. Napabalita pang may itinatagong armas nukleyar ang Amerika sa ating bansa noon.

Ngunit naabutan natin ang Visiting Forces Agreement (VFA) at Enhanced Defense Cooperation Agreement (EDCA) para papasaukin ang mga pwersang Amerikano at muling magbase sa bansa ang kanilang militar. Naabutan natin ang panghihimasok ng mga Tsino sa Kapuluan ng Kalayaan (Spratly Islands) at Bajo de Masinloc (Scarborough Shoal). Naabutan natin kung paano mag-iringan ang Amerika at Tsina para kontrolin ang South China Sea o West Philippine Sea at pagpasok ng kanilang mga malalaking barkong pandigma sa ating karagatan.

Tahasan din ang ipinapakitang pananakop ng Tsina sa mga isla ng Kalayaan sa pagtatayo nila ng mga pasilidad sa mga isla. Hindi na rin makapangisda ang mga Pilipinong mamamalakaya sa ating karagatan dahil sa pananakot ng mga Tsino.

At huwag kalilimutan ang pagkasira ng ating pambansang yaman sa Tubbataha sa Palawan noong 2013 dahil sa pagsadsad ng USS Guardian na puminsala sa halos 4,000 kilometro kuwadrado ng bahura. Nariyan rin ang pagtatapon ng nakalalasong kemikal sa ating mga dagat at paglabag sa karapatan ng mamamayan tuwing isinasagawa ang taunang Balikatan military exercises.

Sa oras na nalalagay sa panganib ang ating pambansang kasarinlan dahil sa pagpasok ng mga dayuhan, tungkulin natin bilang mamamayan ang tumindig at ipagtanggol ang bayan mula sa pananakop at pagyurak sa ating kalayaan at soberanya.

Pinalayas ng sama-samang pagkilos ng mamamayan noong maagang bahagi ng dekada ’90 ang pananatili ng mga base militar ng Amerika sa ating bansa at patuloy nating tinututulan ang VFA at EDCA. Hindi tayo papayag na gawing himpilan ng kanilang armas at pwersa upang maglunsad ng digmaan sa Asya-Pasipiko. Hindi rin tayo papagitla sa ginagawang agresyon ng Tsina sa ating teritoryo. Ang Pilipinas ay para sa mga Pilipino at di kailanman para sa sinumang dayuhan.

Tinatawag muli ng panahon ang kabataan at mamamayang may pagmamahal at malasakit sa Inang Bayan. Ipagtanggol ang kanyang yaman at kalikasan, ang kanyang kalayaan at kasarinlan mula sa dayuhang pandarambong at pagkawasak.

Mahalaga ang papel ng kabataan sa ating panawagan at paglaban. Hindi naging hadlang ang murang edad sa pambansang pagpapalaya tulad ng ating mga bayaning sina Andres Bonifacio at Emilio Jacinto na pawang nasa kanilang mga kabataan nang maglunsad ng rebolusyon laban sa mga Espanyol.

Kaya’t marapat tayong sumama at kumilos ngayong ika-12 ng Hunyo sa mga embahada ng Tsina sa Makati at Estados Unidos sa Maynila. Ipakita ang ating pagkakaisa sa paglaban sa mapanghimasok na mga dayuhan at igiit ang ating kasarilan.

Tumindig sa darating na Araw ng Kalayaan. Sumama sa malawak na hanay ng mga Pilipinong lipos ng diwang makabayan at igiit ang pambansang soberanya at integridad na teritoryal. Walang ibang magtatanggol sa ating bayan kundi ang kanyang mga mamamayan.