Kaso vs mag-asawang Tiamzon, ibinasura ng korte

April 17, 2015

Sina Wilma at Benito Tiamzon, kasama ang abogadong si Krissy Konti at Ofel Balleta ng Karapatan. Photo courtesy: <b>Krissy Conti</b>

Sina Wilma at Benito Tiamzon, kasama ang abogadong si Krissy Konti at Ofel Balleta ng Karapatan. Photo courtesy: Krissy Conti

Ibinasura ng Quezon City Regional Trial Court Branch 81 ang isa sa dalawang kaso ng kidnapping laban kina Benito Tiamzon at Wilma Austria, mag-asawang rebolusyonaryo at kapwa peace consultant ng National Democratic Front of the Philippines (NDF).

Ayon sa grupong Karapatan, nabigong sumipot sa pre-trial hearing ng korte si Sgt. John Jacob, tumatayong complainant-witness sa isang kaso laban sa mag-asawa.

Dahil sa usaping seguridad, isinagawa ang pagdinig sa Training Service of the Camp Crame PNP General Headquarters sa halip na sa Quezon City Hall of Justice.

Ayon pa sa Karapatan, matapos daw ang pagdinig, galit na lumabas si Wilma Austria dahil sa sakit ng pagkakaposas ng dalawang kamay niya. “May sakit ako sa likod. Hindi ko mapagdikit ang mga braso ko, dahil masyadong masakit. Hiling ko lang posasan nila ako sa isang braso,” sigaw umano ni Austria.

“Napakawalang-pakundangan ng mga guwardiya sa isang babaeng may iniindang karamdaman. Ano’ng kinatatakutan nila samantalang sa loob ng bakuran ng Camp Crame ang biyahe nila?” sabi ni Cristina Palabay, pangkalahatang kalihim ng Karapatan.

Bagamat ibinasura ang isang kaso, magpapatuloy pa rin ang isang kaso ng kidnapping dahil biglaang pagsipot ng isa sa apat na testigo.

“Nakakagulat ang biglang pagsipot ni Lt. Abraham Casis, sa loob ng 28-taong hindi siya sumipot sa anumang pagdinig ng korte na nagbunga ng dismissal ng kaso laban sa iba pang kasama nina Tiamzon sa kaso,” dagdag ni Palabay.

Ang nabanggit na kaso ay pag-aresto ng New People’s Army (NPA) sa limang sundalo noong 1989 sa Tiaong, Quezon. Kasama sa mga tinaguriang prisoners of war ng NPA si Lt. Casis, na pinalaya rin ng grupo.

Habang isinasagawa ang pagdinig sa loob, nagprotesta naman ang iba’t ibang grupo sa labas ng Kampo Crame para ipanawagan ang pagpapalaya sa mag-asawang Tiamzon, gayundin ang iba pang peace consultant ng NDF at mga bilanggong pulitikal.

Bukod sa natirang kaso ng kidnapping, kinakaharap pa ng mag-asawa ang kasong illegal possession of firearms and explosives sa Toledo, Cebu at dinidinig naman sa Manila Regional Trial Court ang kasong multiple murder laban sa kanila.

“Patung-patong na kaso ang isinampa ng rehimeng Aquino sa mga peace consultant. Dahil ayaw na ayaw ng rehimen ang sinseridad ng mga ito para sa tunay at pangmatagalang kapayapaan,” ani Palabay.