Sa tulong ng kanyang mga abogado, pinayagan ng korte ang bilanggong pulitikal na si Alan Jazmines na bumisita sa burol ng kanyang ina na si Cristina V. Jazmines, 92-anyos, na namatay noong Enero 1, 2013.

Tatlong oras siyang nakalabas sa piitan sa Bicutan para bumisita sa burol ng kanyang ina sa Loyola Memorial Chapels sa Commonwealth. Sinamahan si Jazmines ng dalawang van ng armadong jail officers. Buong panahong nakaposas siya.

Nagkaroon ng necrological service, at nakapagsalita si Jazmines. Aniya, nagpapasalamat siya sa mga abogado niya sa pagpapayag sa korte na pansamantalang makabisita siya sa burol ng kanyang ina.

Sinabi ni Jazmines na sinuportahan siya ng kanyang ina sa mga pagkilos niya, maging noong umanib siya sa kilusang underground. Kahit umano negosyante ang ina, pumayag siyang ipasailalim sa repormang agraryo ang kanilang lupain sa Ilocos Norte nang walang kapalit.

Sa ilang beses na pagkakulong ni Jazmines, noong panahon ng batas militar at ngayon, regular daw na dumadalaw sa kanya ang kanyang ina sa kulungan.

Ang huling pagkakataon na sila ay nagkita na si Allan ay nasa laya ay sampung taon na ang nakaraan.

Masaya si Jazmines na makita ang maraming kamag-anak at mga kaibigan at kaklase sa Ateneo de Manila sa burol. Kabilang dito si dating Department of Education Sec. Edilberto de Jesus.

Sa kanyang pananalita, muling iginiit niya na dapat palayain siya ng administrasyong Aquino. Isa si Jazmines sa 12 konsultant ng National Democratic Front of the Philippines (NDFP) na hinihiling ang kagyat na pagpapalaya sa pagpapatuloy ng usapang pangkapayapaan sa pagitan ng rebolusyonaryong kilusan at gobyerno.

Teksto ni Pom Cahilog-Villanueva | Kuha ni Pom Cahilog-Villanueva at ng Arkibong Bayan