Na-trapik ang appeal bond
Sa isang labor case, kapag natalo ang manggagawa , maari siyang mag-apela sa National Labor Relations Commission (NLRC). Wala siyang babayaran sa gagawin niyang apela maliban lamang ang “appeal fee” na nagkakahalaga ng mahigit P500.00. Ngunit kung ang manedsment ang matalo, kailangan pa niyang maglagak ng “bond” na katumbas ng napanalunang pera ng manggagagawa. Ang […]
Sa isang labor case, kapag natalo ang manggagawa , maari siyang mag-apela sa National Labor Relations Commission (NLRC). Wala siyang babayaran sa gagawin niyang apela maliban lamang ang “appeal fee” na nagkakahalaga ng mahigit P500.00. Ngunit kung ang manedsment ang matalo, kailangan pa niyang maglagak ng “bond” na katumbas ng napanalunang pera ng manggagagawa.
Ang bond na ito ay kailangang ilagak niya sa loob ng sampung (10) araw mula sa pagkatanggap niya ng desisyong kanyang inaapela. Kapag ang manedsment ay hindi nakapagbigay ng appeal bond sa sinasabing panahon, madi-dismiss ang kanyang apela.
Nangyari ito sa isang kilalang kompanya sa kasong “Wallem Maritime Services, Inc. et. al. vs. Eriberto S. Bultron” (GR No. 185261) na hinatulan ng Korte Suprema nitong Oktobre 2, 2009.
Sa nasabing kaso, nagsampa ng demanda itong si Eriberto, isang seaman, laban sa kanyang kompanya. Nagkasakit umano si Eriberto sa kanyang trabaho bunga ng kakulangan ng safety at protective gear sa barkong kanyang sinakyan. Dahil dito, humingi siya ng danyos at disability benefits sa kompanya.
Dininig ng Labor Arbiter ang kaso at napatunayang nagkasala nga ang kompanya. Sa kanyang desisyon, inutusan ng Labor Arbiter ang kompanya na magbayad ng $60,000 dito kay Eriberto.
Natanggap ng abogado ng kompanya ang desisyon ng Labor Arbiter noong Nobyembre 4. Pagdating nang Nobyembre 14, araw ng Biyernes, nagpadala ng kanyang apela ang abogado sa NLRC ng kompanya.
Sa kasamaang palad, walang kasamang appeal bond ang nasabing apela.
Noong sumunod na Lunes, Nobyembre 17, saka pa lamang nakapagbigay ng appeal bond ang kompanya. Nang malaman ito ni Eriberto, kaagad siyang nagsampa ng motion para ma-dismiss ang apela ng kompanya.
Simple lang ang sagot ng kompanya. Natagalan daw ang pag-process ng kanilang appeal bond ng insurance company na pinagawa nila nito. Bandang alas-kuwatro na raw nang hapon noong Nobyembre 14 nang matapos ito. Agad naman daw itong dinala ng abogado ng kompanya mula sa Makati papuntang Maynila, ngunit sobrang trapik daw noong araw na iyon.
Dahil dito, tinawagan na lang daw ng abogado ang kanyang opisina at inutos na i-file na lang ang apela ng kompanya kahit walang appeal bond. Kung baga, “to follow” na lang ang appeal bond.
Noong sumunod na Lunes, Nobyembre 17, agad naman daw na ibinigay nila ang nasabing appeal bond. Kaya, hindi araw totoong na-delay ang kompanya sa pagsumite nito ng appeal bond.
Naniwala sa paliwanag ng kompanya ang NLRC at hindi niya dinismiss ang apela ng kompanya. Matapos pag-aralan ang kaso, binaliktad ng NLRC ang desisyon at sinabing walang kasalanan ang kompanya at hindi ito dapat magbayad kay Eriberto.
Si Eriberto naman ngayon ang nagdala ng kaso sa Court of Appeals (CA). Dito, muling nabaliktad ang desisyon. Sinabi ng CA na tama ang Labor Arbiter at dapat ngang pagbayarin ang kompanya kay Eriberto.
Dinala naman ng kompanya sa Korte Suprema ang kaso. Mali raw ang Court of Appeals sa ginawa nitong pagbalik sa desisyon ng Labor Arbiter. Dapat raw ang desisyon na lang ng NLRC ang sinunod.
Tama ang Court of Appeals , paliwanag ng Korte Suprema.
Sinasabi ng batas na kailangang may kasamang appeal bond ang apela ng kompanya para tiyakin na mabayaran ng kompanya ang anumang babayarin para sa manggagagawa na nakalagay sa desisyon ng Labor Arbiter. Ang appeal bond na ito ay dapat maibigay sa loob ng sampung (10) araw mula pagkatanggap ng desisyon. Kapag ang apela ng kompanya ay walang kaukulang appeal bond, walang karapatan ang NLRC para tanggapin ito.
Lumalabas na nang isampa ng kompanya ang kanyang apela noong Nobyembre 14, wala itong kasamang appeal bond. May sampung araw ang kompanya para magbigay ng nasabing appeal bond pero hindi niya ito nagawa.
Ang pagbigay niya ng appeal bond noong Nobyembre 17 ay lampas na sa araw na tinakda ng batas. Dahil dito, hindi kumpleto ang nasabing apela at walang karapatan ang NLRC upang bigyang daan ito. Dapat lamang ipatupad ng mahigpit ang patakaran tungkol sa pagsumite ng appeal bond, paliwanag ng Korte Suprema. Kung walang appeal bond, walang jurisdiction ang NLRC para tanggapin ang isang apela. Kaya mali ang ginawang pagtanggap ng NLRC sa apela ng kompanya at tama ang desisyon ng Court of Appeals tungkol dito.
Kaya mga mambabasa, kapag nanalo na kayo sa inyong labor case at sakaling nag-apela pa ang kompanya, tingnan agad kung may kasamang appeal bond ang apela nito. Kung wala, tapos na ang kaso at tiyak na ang inyong panalo.