Oplan Bantay Laya, Sumalangit Nawa

Natiyempuhan ko lamang basahin sa pahayagan kamakailan
ang balitang nagpakamatay sina Librado at Martin Gallardo
sa Barangay Conversion, Pantabangan, Nueva Ecija—

hintay muna, baka may masahol pang higit sa tinamasang hagupit—

upang maiwasan ang walang pakundangang tortyur ng Armed Forces of the Philippines.

Uminom lang ng pesticide, ayos na—
Tumakas na sila sa walang patawad na sundalo ng 48th Infantry Battalion—

Sabi ni Heneral Palparan: “We are sorry if you are killed in the crossfire.”
Hintay muna, baka may malupit pang sentensiya sa inyo!

Lason sa balang at salot, nakalusot din sa “crossfire” ng mga bantay-salakay….
Lumaya rin sa gobyernong mapagkandili’t maawain
Nakaiwas din ang dalawang bangkay sa mapagpalayang militar

Salamat po, Heneral, sa hatol niyo’t pagpapaumanhin—
Salamat po, Madame Presidente, sa pesticide na inyong mamanahin-

Sa susunod na “crossfire,” “sorry” din kami’t kayo po’y hihintayin….

* * *

Nagtatanong ang mga Mangingisda sa Guimaras,
Nakatutok sa Sinumang may Budhi’t Pagmamalasakit:

Pumalaot kaming tangay ng alon, haplos ng mabiyayang kalikasan

hanggang barahin ng ilan libong isdang inaanod, lumulutang—

(Ang tubig ma’y malalim malilirip kung libdin)

Ay, bahong nakapanglulunos—
Korales na naging uling
Kinulapulan ng kalawang ang damong-dagat—
Ay, Diyos ko, anong balahong bumagsak dito?

(Katitibay ka tulos sakaling datnang agos
ako’y mumunting lumot sa iyo’y pupulupot)

Anong biyayang sumambulat—kaninong budhing maliwag paghanapin?

Itanong kay Reyna Lara Quigaman, Miss International ng globalisasyon
Itanong kay Manny Pacquiao, kampyon din ng sampung milyong OFWs

Ang tubig ma’y malalim malilirip kung libdin….
Lunday kong aanud-anod pinihaw ng balaklaot)

Pero huwag, huwag itanong sa Presidente sampu ng kanyang mga Heneral—
HUWAG
HUWAG PO
NAKU PO—
Baka ikulapol sa inyo ang ilang medalya ng Order of Lakandula
Baka sangkaterbang bariles ng langis ang ipabuya’t ipaubaya sa inyo!

(Ay, pinihaw ng balaklaot—
Ay, pinuluputan ng negosyanteng mapag-imbot—

Kaya lamang napanulot nang umihip
ating pinagbuklod na timog)

Si E. San Juan, Jr. ay kilalang progresibong makata, manunulat, kritiko at teorista na nakapaglimbag ng maraming mga aklat. Isang iskolar na kinikilala sa buong daigdig, siya ang kasalukuyang direktor ng Philippine Cultural Studies Center sa Connecticut, USA. Kalalathala lamang ng kanyang mga koleksiyon ng tula: Alay sa Paglikha ng Bukang-Liwayway (Ateneo de Manila University Press) at Sapagkat Iniibig Kita (University of the Philippines Press).

balik sa itaas | sunod