Hay naku, mga mare! Pambobola na naman ang isinasalubong sa atin ni Gloria sa bagong taon. Kesyo raw ang ating ekonomiya ay nasa ‘upswing’ o umuunlad. Kesyo raw papataas na ang antas ng pamumuhay ng mga mamamayang Pilipino. Higit sa lahat, kesyo raw ngayon ay ramdam na ramdam ng mga mamamayan ang mga pag-unlad na ito.

Kilala na natin si Gloria bilang mapanlikha. Nilikha nila ni Garci ang mga boto niya noong halalang 2004 na tila ba kayang-kaya nila itong hugutin mula sa kawalan. Nakalikha siya ng tagpi-tagping kuwento para ipataw ang sari-saring mapanupil na polisiya sa mga mamamayan katulad ng calibrated pre-emptive response, EO464 at PP1017. At ngayon, lumilikha siya ng pang-ekonomiyang ilusyon para mapaniwala ang taumbayan na gumagaan na ang buhay nating lahat.

Ang ating mga sikmura, mga mare, ang magsasabi kung gaano katotoo ang mga kwentong ito. Kasi mga mare, ayon sa sarbey ng Social Weather Station o SWS, ang kagutuman ay nag-double digit na simula noong 2004 kung kailan “nanalo” si Gloria sa halalan. At ayon sa sarbey noong Disyembre 2006, 19 porsiyento ng mga Pilipino ay nakaranas ng kagutuman sa nakaraang tatlong buwan. Ito ang pinakamataas na rekord ng kagutuman sa bansa.

Ayon din sa sarbey, 52 porsiyento ng Pilipino ay naniniwalang sila ay mahirap at 40 porsiyento ay naniniwalang kapos sila sa pagkain. Ilang porsiyento lang ba sina Gloria at kanyang mga alipores na nagsasabing umuunlad na ang pamumuhay ng taumbayan?

Sa halip, ano ba ang sumasayad sa ating mga sikmura mga mare kundi ang patuloy na pagtaas ng presyo ng diesel, gasolina at lalo na ng LPG. Ayon sa monitoring ng Center for Women’s Resources, ang LPG ay 14 beses nagtaas ng presyo ngunit 11 beses lamang nag-rollback. Suma total, P34.50 ang average na itinaas nito noong nakaraang taon. Ang diesel naman ay 14 beses ding nagtaas ng presyo ngunit siyam na beses lamang nag-rollback kaya nasa P2.89 ang itinaas nito noong 2006. Ang gasolina ay 19 beses nagtaas ngunti siyam na beses lamang nag-rollback kaya nasa P1.96 ang itinaas ng presyo nito.

Kaya mga mare, dapat nating suriing mabuti ang bawat pahayag na lumalabas sa bibig ng mga nasa pamahalaan ni Gloria. At higit sa lahat, huwag tayong matakot na sabihin kung ano ang totoo kahit na iyon ay taliwas sa kanilang pahayag. Palayain natin ang katotohanan dahil ang katotohanan din ang magpapalaya sa atin.

nauna | balik sa itaas

home | editoryal | opinyon | balita | suring balita | balitang OFW | lathalain | kultura | showbiz | sports | samut sari | kontakin kami
© Pinoy Weekly 2005 - 2006