MATAPOS bahagyang alisin ang deployment ban sa Jordan, dapat makipagkasundo ang gobyernong Arroyo sa Jordan at iba pang bansa sa Middle East para lumikha ng isang labor rights pact para matiyak ang kaligtasan at kapakanan ng mga Pilipinong nagtatrabaho sa naturang lugar, ayon sa Migrante – Middle East.

“Ang paglikha ng isang labor rights agreement sa pagitan ng Pilipinas at Jordan ay isang hakbang pasulong sa pagtiyak ng karapatan at kagalingan ng mga OFW (overseas Filipino workers). Dapat tiyakin ng labor rights pact na ito na may pananagutan ang mga dayuhang employer sa kinuha nilang manggagawa,” ayon kay John Leonard Monterona, tagapag-ugnay ng Migrante- ME.

Duda ang Migrante sa DoLe Order No. 93-08, Series of 2008, na nagbigay-daan sa partial deployment ng mga manggagawang Pilipino sa Jordan, sa kondisyong susuweldo sila nang hindi bababa sa US$400 kada buwan at dapat lamang silang ideploy sa lehitimong mga employer.

“Paano masisiguro ng DoLE na rerespetuhin ng mga employer ang mga probisyon sa kontrata?” tanong ni Monterona.

Ani Montenora, dapat na harapin ng DoLe ang pagpapadala ng mga manggagawang Pilipino sa prinsipyo ng pagprotekta sa kanilang karapatan at kagalingan sa pagkakataong makarating na sila sa bansang pagtatrabahuan at hindi sa mga proseso na wala namang direktang kinalaman sa pananagutan ng dayuhang employer sa OFW.

Sinabi pa ni Monterona na matitiyak lamang ang pananagutan ng employer sa inupahan niyang manggagawa kapag nakipagkasundo ang gobyerno nito sa isang bilateral na kasunduan sa karapatan ng mga manggagawa sa bansang katulad ng Pilipinas.

Soliman A. Santos